ومضة
دخت بيك بجمالك ما الك مقياس
وأضل محتار لو اوصف رمش عينك
بجمالك مو فقط بس دوخيت الناس
بجمالك دوخت اقران كتفينك
دارمي
حسنك سوة بلوة وخلة عقلي يطير
شكتب يا نهج ماظن الك تفسير
ومضة
ماعندي جمال وحتى اقيس اوياك
ولاني عيوني حلوة ابدورة الساعه
ومو مثلك جميل امـــــــــدوخ الناس
اذا تطلع الشارع هاي طركاعــــــــه
دارمي
تفسيري معجم صار يتفكك ابساع
وانت الحلاة البيك ماتحمل الكــــاع
ومضة
لأن حسنك عجيب الكون دايخ بيك
واذا شافتك عيني يظل دمعها يكت
معقولة انة اعاين للشمس ليفوك
فلاش يصير بيها اتحسر واسكت
دارمي
شنهي الحلاة البيك وسهامك تصيب
تاتو وحواجب سيف برموشك تخيب
ومضة
انت بلوة من الحسن ميّل شجاك
لاتصد لعيوني يعمن بــــــــــالخزر
وانت تتعمد تصد ليــــــــــه وتروح
المـــده تاخذني ويرجعني الجزر
دارمي
كلي العيون امنين جـــــــايبهه كلي
صدكني بيهن حيل راح انسه اهلي
ومضة
انت مو بلوة حسن شي مستحيل
لان ما شايف كمر يضوي بنهار
وانت من تمشي بارض فد شي عجيب
حتى لحديثات منك هم تغار
دارمي
من اذكر عيونك بيش اصبر الروح
مليانة قهر هم وعليك تنوح
ومضة
تدري غارن ليش مــــو لني جميل
جي لان اسمر وجـــــــــه حنطاوي
وعندي خوش عيون غاطيهن دلال
ابن كرنة وصـــــــــح ابن شرشاوي
دارمي
صح عندي خوش اعيون بس انت احله
مثل العنب ملكوط وباحله سلــــــــــــــه
ومضة
انا بالمعقل اصيحن يا ملاك
يوصل لحسنك يجي يراويني
لان شغلك مو شغل تسعة اشهور
يمكن اكثر هيج عند اسنيني
دارمي
بأحلة سلة تريد هيج انة خليك
ماصح شبيهك دوم بس انة شاريك
ومضة
حسني مو آيه ويصح منه قليل
والملامح عندي كلش واضحــــه
بس حسنكم مايصح مثله بديل
واليقارن بيك الله يسامحـــــــــه
دارمي
خليني مو باسلال خليني بيـــــدك
واشبكني كون اتريد واصرخ اريدك
تحياتي لكم
